«Ертістің» спорт директоры: шабуылға көп иек артамыз – физикалық дайындығымыз жақсы

«Ертістің» спорт директоры Константин Горовенко ASnews.kz тілшісіне берген сұхбатында павлодарлық команданың нәтижелі ойын көрсетуіне ненің себеп болғанын түсіндірді. Олар соңғы төрт матчта 19 гол соқты.

«Ертіс» – кәсіби адамдардың командасы: әркім өз жұмысына назар аударады, ал жаттықтырушылар штабы шабуылдаушы ойынға иек артады. Бақытымызға орай, бізде жақсы ойыншылар жиналған, бұл бізге шабуылда және алаң ортасында комбинациялар жасауға мүмкіндік береді, сондықтан бәсекелестіктің жоғары екенін байқауға болады. Егер бірдеңе дұрыс болмаса, матч барысында жігіттер қосалқы құрамнан шығып, өзгеріс жасай алады.

Қарсыласымыз қорғанысқа қамалып алатын ойындар бар, сондықтан үзілістен кейін бос аймақтарды жабуға күш жетпей қалады. Бірақ «Ертістің» физикалық дайындығы мықты, біз екінші таймда тек қана күшейеміз», – деді маман.

Горовенко «SD Family» (7:2) қақпасына бес гол соққан Еркебұлан Тұңғышбаевтың рөлін атап өтті:

«Өкінішке орай, ол жақында «Оңтүстікпен» өткен матчта (1:0) жарақат алып, жеке жаттығуға мәжбүр болды. Қазір Еркебұлан қосалқы құрамнан шығып жүр, бірақ ол алғашқы минуттан ойнауға лайық футболшы. Жас ойыншылар одан үлгі алуы керек».

Бірінші лиганың 23-турында «Ордабасының» бұрынғы жартылай қорғаушысы небәрі 10 минутта төрт гол соғып, соңғы минуттарда тағы бір рет мергендігімен көзге түсті. Ол екінші таймның басында алаңға шықты.

«Ертіс» қазір 54 ұпаймен турнирлік кестеде екінші орында тұр.