Эксперт – «Қайраттың» ЧЛ-дағы матчы туралы: егер жақсылап дайындалса, «Брюггеге» қиын болады

Бельгиялық журналист және VTM Nieuws жүргізушісі Ярно Берто ASNews.kz (BorodAbata.kz) тілшісіне берген сұхбатында «Брюггенің» күшті және әлсіз тұстарына тоқталды. «Қайрат» олармен Чемпиондар лигасының жетінші турында күш сынасады.

«Брюггенің» артықшылығы тек мүмкіндіктерді голға айналдыруда ғана емес, сонымен қатар команданың тепе-теңдігінде. Мұнда мансабын аяқтайтын тәжірибелі ойыншылардан бөлек, Еуропаның ең жақсы клубтарына кетуді аңсап жүрген жас таланттар бар. Ал алаң жиегінде тіпті фавориттерге қарсы матчтарда стратегиядан қателеспейтін жаттықтырушы тұрады. Іздеп қарасаңыз, бір жарым жыл ішінде Хайеннің (бас бапкер – ред.) сәтсіздікке ұшыраған үш ойынын да таба алмайсыз.

Команданың әлсіздігі неде дейсіз бе? «Брюггенің» ойынын бір көргеннен түсінуге болады: олар комбинация жасайды, шабуыл ұйымдастырады және ешқашан жабық футбол ойнамайды. Олар алаңға тең ойнаймыз деп шықпайды. Сондықтан, егер қарсылас тыңғылықты дайындалып, «Брюггенің» тактикалық олқылықтарын тапса, бельгиялықтардың көрер қызығы аз болады», – деді Берто сұхбатында.

«Брюггеге» қарсы кездесу 20 қаңтарда Алматыда өтеді. Жылдың осы уақытында ауа температурасы әдетте -5 ° C-тан -15 ° C-қа дейін болады, ал Бельгияда мұндай климат сирек байқалады.