Шпилевский – «Қайраттың» «Реалмен» ойындағы мүмкіндігі жайлы: тосынсый күтуге болады

«Қайраттың» бұрынғы бапкері Алексей Шпилевский ASNews.kz (BorodAbata.kz) тілшісіне берген сұхбатында алматылық команданың Чемпиондар лигасында «Реал», «Интер» және «Арсеналмен» бәсекеге түсе алатынын айтты.

«Әр матчтан ләззат алу керек. Менің ойымша, алматылықтардың «Селтикке» қарсы ойында мұндай ерлік (пенальти бойынша 3:2) жасайтынын ешкім күтпеген еді, бірақ ауызбіршілік пен тәртіптің арқасында «Қайрат» бұған қол жеткізді. Сондықтан да тосынсый әр матчта болуы мүмкін, себебі футболда мүмкін емес нәрсе жоқ.

Бүгінде командалар бір-біріне жақындай түсті – жағдай бұрынғыдай емес. Жаттықтырушылар өсіп келеді, ойыншылардың да деңгейі өсті, сондықтан қазір сіз: «Мына команда айқын фаворит» деп айта алмайсыз. Енді жігіттер алаңда барлығын дәлелдеуі керек, мен Чемпиондар лигасының ойындары өте қызықты болатынына сенімдімін. «Қайратқа» жанкүйер боламын!» – деді беларусь маманы.

19 қыркүйекте «Қайрат» Чемпиондар лигасының негізгі кезеңін «Спортингке» қарсы ойынмен бастайды, содан кейін Рафаэль Уразбахтин шәкірттері «Реал», «Интер», «Арсенал» сияқты топ-клубтармен кездеседі.