Шпилевский – «Қайраттың» ЧЛ-на шығуы жайлы: бұл бүкіл Қазақстан үшін үлкен жетістік

«Қайраттың» бұрынғы бас бапкері Алексей Шпилевский ASNews.kz (BorodAbata.kz) тілшісіне берген сұхбатында алматылық команданың Чемпиондар лигасына шығуына қатысты ойымен бөлісті.

«Кеше ғана Қайрат Советайұлымен сөйлескен едік. Мен оны Чемпиондар лигасына шыққанымен құттықтап, мұның қисынды екенін атап өттім, себебі бұл мақсатқа жету үшін көп жылдар бойы жұмыс жасалды. Инфрақұрылым, философияс, идея, Қазақстан футболының дамуына қосқан үлесі... Бұл – лайықты жетістік.

Иә, нәтиже бірден бола қойған жоқ, бұл «Қайрат» үшін ғана емес, бүкіл Қазақстан үшін үлкен оқиға. Жігіттерді тағы да көпшілік алдында құттықтаймын және одан әрі жылжуына тілектеспін – олар Еуропадағы ең үздік турнирде жетістікке жете берсін», – деді беларусь маманы.

Шпилевский алматылық клубты 2018-2021 жылдар аралығында жаттықтырды. Оның жетекшілігімен «Қайрат» ел чемпионы атанды. Қазір беларусь маманы ресейлік «Пари НН» клубын баптауда.

Чемпиондар лигасында «сары-қаралар» «Реал», «Интер», «Арсенал» сынды алпауыттармен кездеседі.