Косович – «Қайраттың» ЧЛ-на шығуы жайлы: олар бұған лайық болды

«Қайраттың» бұрынғы жартылай қорғаушысы Небойша Косович BorodAbata.kz (AS News) сайтына берген сұхбатында алматылық команданың Чемпиондар лигасына шығуына қатысты пікір білдірді.

«Мен «Слован» мен «Селтикке» қарсы матчтарды көрдім – «Қайраттың» тамаша тактикасы мен қорғанысы бар. Әр ойыншы команда үшін аянбай тер төкті. Тіпті шабуыл шебіндегі Сәтпаевтың өзі барын салды. Ойыншылар, жаттықтырушылар, қызметкерлер – бәрі де Чемпиондар лигасына шығуға лайық болды. Әрине, Боранбаев үшін қуаныштымын: ол мұнда он жыл бойы күш-жігерін жұмсады және бұл нәтижесін берді», – деді черногориялық футболшы.

Косович сондай-ақ алматылық клубтың жанкүйерлеріне үндеу жасады:

«Құттықтаймын! Әр ойыннан ләззат алыңыздар. Еуропаның үздік клубтары Алматыға келсін – бұл қала осындай ауқымды шараларды көптен күткен еді. Мен сіздермен мақтанамын».

Косович «Қайрат» сапында 2019-2021 жылдар аралығында өнер көрсетіп, ел чемпионы атанды, 72 кездесуде 19 гол соқты. Қазір еркін агент ретінде клубсыз жүр.