BBC Sports жүргізушісі: «Қайраттан» тосын сый күтеміз

BBC Sports дикторы Джордж Аддо BorodAbata.kz (AS News) тілшісіне берген сұхбатында «Қайраттың» Чемпиондар лигасының негізгі кезеңіне шығуына Батыс баспасөзінің реакциясын және алда күтіп тұрған Еуропаның топ клубтарымен кездесулерді бағалады.

«Меніңше, бұл – нағыз жаңа леп болды. Соңғы рет қазақстандық клубты Чемпиондар лигасында «Астана» арқылы көрдік – ол туралы көбірек білетінбіз. Ал «Қайрат» көлеңкеден шыққандай болды: көпшілік олардың қандай жұмыс жасағанын байқамады. Реакция да мынадай болды: «Бұл қандай клуб? Олар не істей алады?» Адамдар олардың тарихын естіп, сіз сияқты қазақ журналистерімен сөйлесіп, прогресті көргенде, «Қайратты» бағалай бастады.

Енді топтық кезең басталғанда бәрі ертегідей оқиғаны күтеді: мүмкін, солар дәл сондай тарихқа айналар. Әрине, «Қайраттан» турнирді жеңуді ешкім күтпейді, бірақ тосынсый күтіледі. Дебютантқа деген қызығушылық өте үлкен», – деді тілші.

Еске сала кетейік, «Қайрат» тарихында алғаш рет Чемпиондар лигасының негізгі кезеңіне шықты. Алматы клубы плей-оффта шотландиялық «Селтикті» пенальти сериясында жеңген болатын.

Жалпы кезеңде алматылықтар сегіз ойын өткізеді – төртеуі өз алаңында, төртеуі сырт алаңда. Алматыда «Қайрат» мадридтік «Реалды», «Брюггені», «Олимпиакосты» және кипрлік «Пафосты» қабылдайды. Қонақта олар «Интермен», «Арсеналмен», «Спортингпен» және «Копенгагенмен» кездеседі. Алғашқы матчтар 16–18 қыркүйек аралығында өтеді.