Жоржиньо: екі жыл бұрын фабрикада жұмыс істеп жүрдім, ал бүгін арманым орындалды

«Қайраттың» португалиялық шабуылшысы Жоржиньо BorodAbata.kz (AS News) тілшісі Әлім Динасыловқа берген сұхбатында алматылық клубтың Чемпиондар лигасының шығуына қатысты ойымен бөлісті.

«Екі жыл бұрын осыны армандаған едім, бірақ қол жеткіземін деген ой үш ұйықтасам да түсіме кірмеді. Ол кезде мен әуесқойлар арасында ойнап жүрдім және зауытта жұмыс істедім. Ал қазір сол арманмен өмір сүріп жатырмын», – деді футболшы.

Жоржиньо алматылық командаға Еуропаның басты клубтық турниріне жолдама берген пенальти сериясы туралы да айтты.

«Маэда тебейін деп жатқанда мен өз пенальтиімді орындауға дайындалып жатқан едім. «Селтик» ойыншысы гол соғатын болса, келесі мен тебетін болдым. Бақытымызға орай, Темірлан бізді құтқарып, жеңіс сыйлады. Бұл менің мансабымдағы ең үздік сәт. Мүмкін жалпы кезеңде де біраз атой салатын шығармыз, алдағы уақытта көре жатармыз».

Сондай-ақ ойыншы негізгі құрамда бірнеше футболшының болмағанына қарамастан, командалық рухтың маңыздылығын атап өтті.

«Бізге командада бар жауынгерлермен ойынға шығуға тура келді. Бұл футбол, мұндай жағдайлар болып тұрады. Әрқайсымыз керемет ойнадық. Ал Эдмилсон жақын арада алаңға оралады деп үміттенемін», – деді Жоржиньо.

Сөз соңында португалиялық шабуылшы Чемпиондар лигасындағы қуанышпен қатар Қазақстан чемпионатына да назар аудару маңызды екенін баса айтты.

«Чемпиондар лигасы мен ішкі чемпионат матчтары басқаша. Мұндай ойыннан кейін біз эмоцияны бір жаққа ысырып, синтетикалық алаңда ойнауымыз керек. Егер келесі жылы Чемпиондар лигасында ойнағымыз келсе, чемпионатқа да назар аударуымыз керек».

«Қайрат» Алматыда «Селтикпен» тең ойнап (0:0), пенальтилер сериясында Темірлан Анарбеков жасаған үш сейвтің арқасында Чемпиондар лигасының жалпы кезеңіне жолдама алды.