Рафаэль Уразбахтин – Глазгодағы матч жайлы: «Селтик» бізді бағаламады

Алматылық «Қайраттың» бас бапкері Рафаэль Уразбахтин Чемпиондар лигасының плей-офф раундында «Селтикпен» болатын қарымта матч жайлы пікірімен бөлісті, деп хабарлайды BorodAbata.kz (AS News).

«Білесіз бе, «Селтик» – өте жақсы, жоғары деңгейдегі команда. Ондағы әрбір ойыншының құны біздің бүкіл команданың құнымен бірдей. Кез-келген ойыншысы бізге қауіп төндіреді. Оларда жылдам әрі қауіпті шабуылшылар, күшті жартылай қорғаушылар мен білікті ойыншылар бар. Біз нақты бір ойыншыны ұстамаймыз, себебі қауіп барлық футболшыдан төнеді, себебі «Селтик» жоғары деңгейдегі команда», – деді Уразбахтин.

Сондай-ақ Уразбахтин алдағы матчта шотландиялықтарға үлкен қысымның болмайтынын атап өтті:

«Мен «Селтикке» қысым жоғары болады деп ойламаймын. Олар Глазгода бізді аздап бағаламаған шығар, бірақ ертең басқа мотивациямен шығады. Команданың айналасында жағымсыз атмосфера бар, бірақ «Селтиктегі» жоғары деңгейлі ойыншылар мұндай жағдайларды шешуге дағдыланған».

Глазгода өткен бірінші кездесу голсыз, тең аяқталған болатын. Қарымта кездесу 26 тамызда Алматыда өтеді.