Рикардиньо – «Селтикпен» болатын матч жайлы: мүмкін емес ешнәрсе жоқ

Алматылық «Қайраттың» бразилиялық шабуылшысы Рикардиньо BorodAbata.kz сайтына берген сұхбатында ҚПЛ-дың 21-турында «Елімайға» қарсы өткен матчты (2:3) қорытындылап, Чемпиондар лигасында шотландиялық «Селтикпен» болатын ойынға дайындық туралы айтты.

«Футболда мұндай жағдайлар болып тұрады. Кейде қиынға соғады, өйткені осы аптада біз Братиславада ауыр ойын өткізіп, көп күш жұмсадық. Енді жұмысты жалғастырып, берілмей, келесі матчқа дайындалуымыз керек.

«Селтикке» қарсы ойынға келетін болсақ, ол өте қиын матч болады. Бірақ біз жаттығу жасап, бұл шайқасқа жақсылап дайындалып жатырмыз. Мүмкін емес ешнәрсе жоқ. Бізді әрқашан алға жетелейтін жанкүйерлерге алғысымыз шексіз. «Селтикпен» ойында қалаған нәтижеге жету үшін бар күшімізді саламыз», - деді Рикардиньо.

«Қайрат» 20 тамыздан 21 тамызға қараған түні Глазго қаласында Чемпиондар лигасының плей-офф раундындағы «Селтикке» қарсы алғашқы ойынын өткізеді. Қарымта матч 26 тамызда Алматыда өтеді.