Огай – «Қайраттың» плей-оффқа шыққаны туралы: бұл – Уразбахтин бастаған бапкерлердің еңбегі

Қазақстандық футбол сарапшысы Дмитрий Огай BorodAbata.kz тілшісіне берген сұхбатында Чемпиондар лигасының үшінші іріктеу кезеңіндегі алматылық «Қайрат» пен «Слован Братислава» арасындағы текетіресті қорытындылап, қазақстандық клубтың келесі раундқа өтуге әбден лайық болғанын атап өтті.

«Біз «Қайраттың» жаттықтырушылар штабына алғыс айтуымыз керек. Команда соңғы екі ай бойы бабында тұр. Алматылықтар ұйымдасқан түрде ойнайды, физикалық дайындығы да керемет, ойыншылар алаңда сауатты түрде қозғалады және оң нәтиже тіркеу үшін барын салады. Екінші таймдағы бірнеше эпизодты ескерсек, «Слованның» «Қайраттан» дайындық жағынан кем түскенін байқаймыз. Бірақ Братиславаның клубы алматылықтардың биылғы жылғы ең мықты қарсыласы болды. Ойыншыларының сапасы жағынан «Олимпиядан» да, КуПС-тен де мықты.

Егер Мак екінші таймда гол соққанда, «Слован» келесі кезеңге өтер еді. «Қайрат» көп сәттерде допты жоғалтып алды, әсіресе словактар қарсы шабуылға шыққан кезде. Бірақ «Қайрат» бір команда ретінде ойнап, қорғаныс пен шабуылға шығу кезінде өте мықты көрінді. Алматылық команданың келесі кезеңге өтуі кездейсоқ жағдай емес. Біз мықты қарсыласты қапы қалдырдық», – деді Огай.

Чемпиондар лигасының плей-офф кезеңінде «Қайрат» шотландиялық «Селтикпен» ойнайды. Алғашқы ойын 20 тамыздан 21-не қараған түні Глазгода, қарымта кездесу 26 тамызда Алматыда өтеді.