Шотландиялық эксперт: «Слован» емес, «Қайраттың» келесі кезеңге өткені таң қалдырды

Big Scottish Football Podcast спикері Стивен Милл «Қайраттың» Чемпиондар лигасының плей-офф кезеңіне өтуіне қатысты реакция білдірді. «Слованды» жеңген алматылықтар келесі ранудта «Селтикпен» кездеседі.

«Шындығында, өткен жылы Чемпиондар лигасында көрсеткенін ескере отырып, көпшілігі «Селтикке» «Слованды» қарсылас ретінде көрді. Сондықтан «Қайраттың» жеңіске жетуі аздап таң қалдырды. Шотландиядағылар сіздің клубыңыз туралы біледі ме? Екіталай, бірақ бұл нәтижеден кейін олар сіздерді міндетті түрде құрметтейді.

Менің болжамым? Не болса да, «Селтик» жеңіске жетуі керек – олар өз стадионында өте мықты», - деді Милл BorodAbata.kz сайтына берген сұхбатында.

«Қайрат» кеше Владимир Вайсс шәкірттерін пенальти сериясында (4:3) жеңген болатын.