Тесак – «Қайраттың» келесі кезеңге шыққаны жайлы: «Слованға» қарағанда алматылықтар қаттырақ жеңгісі

«Қайраттың» және Словакия құрамасының бұрынғы қорғаушысы Лукаш Тесак BorodAbata.kz сайтына берген сұхбатында алматылықтардың «Слованға» қарсы өткен жауапты матчына баға берді.

«Біріншіден, «Қайратты» жеңісімен және Чемпиондар лигасының келесі іріктеу кезеңіне шығуымен құттықтаймын. Менің ойымша, «Қайрат» жеңіске жетуді қаттырақ қалады. Ал «Слованға» екінші гол жетіспеді, ойын тең болды, бірақ екінші гол көп нәрсені шешер еді. Бүгін «Қайраттың» жолы болды, олар үшін қуаныштымын.

«Слованның» енді Еуропа лигасында ойнау мүмкіндігі бар, мен олардың жетістікке жететініне сенемін.

Иә, жаттықтырушы Вайсс алаң жиегінде болмады, бірақ бәрі де алаңда шешіледі және ойыншыларға тікелей байланысты. Тағы да құттықтаймын және келесі кезеңде сәттілік тілеймін», – деді Тесак.

Чемпиондар лигасының плей-офф раундында «Қайрат» шотландиялық «Селтикпен» кездеседі. Алматылық команда үшін бұл тарихи жетістік – клуб алғаш рет осы кезеңге жетті.