Владимир Вайсс – Алматыдағы жеңіліс жайлы: біз «Қайраттан» күштіміз

«Слован Братислава» командасының капитаны Владимир Вайсс BorodAbata.kz сайтына берген сұхбатында алматылық «Қайратпен» өткен ойыннан (0:1) кейінгі эмоцияларымен бөлісті.

«Біз қиын ойын күткен едік, «Қайрат» үшін бұл ерекше сәт – плей-офф кезеңіне шығу олар үшін тарихи нәтиже болмақ.

Біз матчты жақсы бастадық, бірақ алғашқы 10 минутта қатты қобалжыдық, қарсыласта екі жақсы мүмкіндік болды. Содан кейін ойынның қарқыны басылып, доп көбінесе алаң ортасында жүрді.

Алаң сапасы керемет болды деп айта алмаймын – дайындаған комбинацияларымызды жасау қиын болды. Қызыл қағаздан кейін бізге одан да қиынға соқты. 0:0 деген есепті жоспарлаған едік, бұл біз үшін жақсы нәтиже болар еді.

Бірақ алда өз алаңымыздағы ойын бар. Біз өз шамамызды білеміз, ойын сапасы жағынан «Қайраттан» асып түсетінімізге сенімдіміз. Оны алаңда дәлелдеп, барымызды салып, келесі кезеңге өту ғана қалды», – деді Вайсс.

Қарымта кездесу 12 тамызда Братиславада өтеді. Матчтың жеңімпазы Чемпиондар лигасының плей-офф кезеңіне өтеді, ал жеңілгені Конференция лигасының топтық кезеңіне қатысуға мүмкіндік алады.