Шотландиялық эксперт: «Селтиктің» «Қайратты» да, «Слованды» да ұтуға шамасы жетеді

Scottish Sun порталының тілшісі Роберт Грив Чемпиондар лигасының плей-офф кезеңі алдындағы «Селтиктің» жағдайы туралы айтты. Алматылықтар іріктеу кезеңінде «Слованды» жеңетін болса, шотландиялық клубпен ойнайды.

«Селтик» қазір жаңа ойыншыларды іздеп жатыр. Олар осы жазда вингер Николас Кюнды «Комоға» 19 миллион еуроға сатып жіберді, бірақ оның орнына футболшы таба алмады. Оның үстіне, Брендан Роджерс жаңа шабуылшы алуды көздеп отыр.

Маусым алдындағы дайындыққа келетін болсақ, команда азулы «Спортинг» (2:0) және «Ньюкасл» (4:0) клубтарына қарсы жақсы ойнады, ал Премьершиптің алғашқы турында «Сент-Мирренді» минималды есеппен ұтты (1:0). Бірақ Шотландия Чемпиондар лигасындағы жеребе нәтижесіне қуанышты болып отыр, себебі олардың «Қайратты» да, «Слованды» да жеңетініне сенімділік бар», – деді Грив BorodAbata.kz сайтына берген сұхбатында.

«Селтик» 120 трофейі бар Шотландиядағы ең үлкен клуб. Команда шамамен 130 миллион еуроға бағаланса, «Қайрат» оларға қарағанда 10 есе арзан.