Барсегян – «Қайратпен» болатын матч туралы: мұнда өткен жылғы жолымызды қайталау үшін келдік

«Қайсар» мен «Астана» клубтарының бұрынғы жартылай қорғаушысы, қазір «Слован» сапында ойнап жүрген Тигран Барсегян BorodAbata.kz сайтына берген сұхбатында алматылық «Қайратпен» болатын матч жайлы пікірімен бөлісті, сонымен қатар қазақстандық футболдың дамуына қатысты өз ойын айтты:

«Біз әрқашан өзімізге жоғары мақсат-міндеттерді қоямыз. Өткен жылы Чемпиондар лигасының топтық кезеңінде ойнадық – бұл команда үшін де, ойыншылар үшін де тамаша деңгей. Қазір өзімізді сенімді сезінеміз. Ең мықты командаларға қарсы ойнап, оларды жеңе аламыз. Былтыр бұл жолдан өттік және бұл нәтижені осы маусымда да қайталаймыз деп үміттенеміз».

Барсегян «Қайраттың» прогресс жасағанына таң қалғанын ашық айтты:

«Қайрат» белсендірек ойнай бастады, құрамында қазақстандық мықты ойыншылар көп – бұл жақсы көрсеткіш. Бірақ «Қайраттың» ең мықты кезі Вайсстың тұсында болды (күлді). Қазір шетелдік ойыншыларға шектеу жоқ, бірақ соған қарамастан, қазақтар да ойнап жүр. Бұл өте жақсы жаңалық. Қазақстан футболы тек қана алға қарай жылжиды деп сенемін».

«Қайрат» – «Слован» кездесуі 6 тамызда Алматыда өтеді. Матчтың жеңімпазы Чемпиондар лигасы іріктеу кезеңінің плей-офф раундына, ал жеңілгені Еуропа лигасының плей-офф раундына өтеді.