Шотландиялық эксперт: «Слован» «Қайратқа» қарағанда «Селтик» үшін қолайлы қарсылас болар еді

Scottish Sun порталының бас редакторы Роберт Грив Чемпиондар лигасының плей-офф кезеңіне арналған жеребе нәтижелеріне тоқталып кетті. «Қайрат» үшінші іріктеу кезеңінде «Слованды» жеңсе, «Селтикпен» кездеседі.

«Шын мәнінде, «Слован» «Селтик» үшін қолайлы қарсылас болар еді. Өткен маусымда олар Чемпиондар лигасының жалпы кезеңінде кездесіп, шотландиялықтар ірі есеппен жеңіске жетті (5:1). Оның үстіне Братиславаға жету оңайырақ – Шотландия төрт сағаттық уақыт айырмашылығы бар Қазақстан емес. Ол жақта климат басқаша.

Бірақ «Селтик» бұған дейін де Қазақстанға барған. Олар «Астанаға» қарсы ойнады, сондықтан шотландиялық клубтың тәжірибесі бар. Брендан Роджерс шәкірттері «Қайратқа» лайықты құрметпен қарайтын болады. Сіздерде тамаша халық бар, біздің жанкүйерлер Алматыға қуана-қуана ұшып барар еді», - деді британдық сарапшы BorodAbata.kz сайтына берген сұхбатында.

Алматылықтар мен Владимир Вайсс шәкірттері арасындағы алғашқы ойын 6 тамызда Қазақстанда өтеді. Қарымта матч 12 тамыз күні Братиславада өтеді.

Осыған дейін «Слован» клубының қорғаушысы, Ақтөбе облысының тумасы Юрий Медведев алдағы матч жайлы пікірімен бөліскен болатын.