Медведев – Сәтпаев туралы: бізге қарсы қалай ойнайтынын көрейік

«Слован Братислава» клубының қорғаушысы, Ақтөбе облысының тумасы Юрий Медведев BorodAbata.kz тілшісіне берген сұхбатында Чемпиондар лигасының үшінші раундында алматылық «Қайратпен» болатын матч туралы пікірімен бөлісті.

«Қайрат» әрине, үлкен команда, мықты қарсылас. Жақсы ойыншылардан жасақталған, бұл матчтан үлкен үміт күтіп отырмыз. Ойынға дайындалып жатырмыз, жақсы, сапалы футбол көрсетіп, плей-офф кезеңіне өткіміз келеді», - деді Медведев.

Футболшы қазақстандық футболды әлі күнге дейін бақылайтынын және достарының ойындарын қалт жібермейтінін де мойындады:

«Иә, мен Қазақстан футболын бақылап отырамын. Уақытым болған кезде ойындарын қараймын. Соңғы рет «Ақтөбенің» «Спартамен» болған матчтарын көрдім. Екі ойын да жақсы болды, бірақ сырт алаңдағы қарымта матчтың «Ақтөбе» үшін сәтсіз аяқталғаны өкінішті. Дегенмен олар өздерінің мықтылығын көрсетті. Менің ойымша, Қазақстан футболы жылдан жылға өсіп, күшейіп келеді.

Қазақстандық клубтарда ойнайтын достарым бар. Мен олармен араласып, ойындарын тамашалап тұрамын», - деді Юрий.

Медведев «Қайраттың» шабуылшысы Дастан Сәтпаевқа да тоқтала кетті:

«Мен Дастан туралы көп білмеймін, бірақ біз «Қайратпен» болатын ойынға дайындық кезінде оның матчтарын тамашаладық. Ол жақсы ойыншы, көп гол соғады. Енді бізге қарсы қалай ойнайтынын көрейік», – деді Медведев.

«Қайрат» пен «Слован» арасындағы матч 6 тамызда Алматыда өтеді. Осы жұптың жеңімпазы іріктеу кезеңінің плей-офф раундына өтеді, онда шотландиялық «Селтикке» қарсы ойнайды, ал жеңілгені Еуропа лигасының плей-офф кезеңінде бақ сынайды.