«Тұранның» экс-футболшысы: Қазақстанда ақша көп, бірақ Словакияда футбол шабуылға негізделген

«Тұран» мен Словакия құрамасының бұрынғы футболшысы Бранислав Слука BorodAbata.kz тілшісіне берген сұхбатында Словакия мен Қазақстан чемпионаттарының деңгейін салыстырды.

«Қазақстан чемпионаты өсіп келеді, оларда бірнеше мықты команда бар және олар әдетте жақсы легионерлерді шақырады – бұл бүкіл чемпионаттың дамуына септігін тигізеді. ҚПЛ-да, менің ойымша, қорғанысқа көбірек көңіл бөлінеді, ойын қорғанысқа қарай ұйымдастырылған. Словакияда, әсіресе «Слованда» шабуылға көп иек артады, оларда да сапалы ойыншылар көп.

Шынымды айтсам, Қазақстан спортында ақша әлдеқайда көп – бұл чемпионат деңгейінің көтерілуіне сеп болады. Бірақ стилі жағынан Словакия чемпионаты маған жақынырақ, өйткені мұнда шабуылға көп көңіл бөледі», – деді Слука.

Бранислав Слука 2024 жылғы маусымның бір бөлігін түркістандық «Тұранда» өткізді.

Чемпиондар лигасы іріктеу кезеңінің үшінші турында словакиялық «Слован» алматылық «Қайратпен» ойнайды. Алғашқы ойын 6 тамыз күні Алматыда өтеді.

Бұған дейін «Динамо» және Словакия құрамасының бұрынғы шабуылшысы Мартин Якубко «Қайрат» – «Слован» матчы жайлы пікірімен бөліскен еді.