ҚПЛ-да ойнаған словакиялық футболшы: «Қайратқа» «Слованнан» өту қиын болады

«Тұран» мен Словакия ұлттық құрамасының бұрынғы ойыншысы Бранислав Слука BorodAbata.kz сайтына берген сұхбатында Чемпиондар лигасының үшінші іріктеу кезеңіндегі алматылық «Қайрат» пен «Слован Братислава» арасындағы ойын туралы пікірімен бөлісті.

«Менің ойымша, «Слован» келесі кезеңге өтеді. Бірінші матчта «Қайратта» сәл басымдық болады, өйткені олар өз алаңында ойнайды – бұл қиын матч болады, бірақ менің ойымша, «Слован» өз алаңында өтетін қарымта кездесуде жеңіске жетеді», – деді Слука.

Словакиялық қорғаушы қазір «Қайраттың» потенциалын бағалау қиын екенін мойындады.

«Айту қиын. Өйткені «Қайрат» сапында жаңа ойыншылар бар, құрам жаңартылды. Шынымды айтсам, команданың соңғы матчтарын көрген жоқпын. Сондықтан бұл қиын сұрақ», – деді «Тұранның» бұрынғы ойыншысы.

«Қайрат» пен «Слован» арасындағы алғашқы ойын 6 тамыз күні Алматыда, қарымта кездесу 12 тамыз күні Братиславада өтеді.

Слука «Тұран» сапында жарты маусым өткізіп, 13 матчта 1 гол соқты.

Бұған дейін Лукаш Тесак бұл кездесу «Слованның» бас бапкері Владимир Вайсс үшін принципиалды болатынын айтқан еді.