«Қайсардың» экс-қорғаушысы: «Зимбру» бірінші гол соқса, «Астанаға» қиын болады

Қызылордалық «Қайсар» мен молдовалық «Шерифтің» бұрынғы сенегалдық қорғаушысы Усман Н'Диае BorodAbata.kz сайтына берген сұхбатында «Астана» мен «Зимбру» арасындағы қарымта матч туралы пікірімен бөлісті.

«Мен бірінші ойынды көрген жоқпын, тек нәтижені көрдім – 1:1. Бірақ оңай болмаса да, «Астананың» Кишиневте жеңіске жететініне сенімдімін. «Зимбру» агрессивті түрде ойнайды, әр доп үшін күреседі. Олардың сапалы стадионы бар, қазір мен Молдовада жүрген кездегіден әлдеқайда мықты команда жинаған.

«Астана» алғаш болып гол соқса, жеңіске жету мүмкіндігі жоғары болады. Егер алаң иелері бірінші гол соқса, «Астанаға» қиын болады».

Н'Диае Молдова чемпионатындағы прогресс жайлы да сөз қозғады:

«Молдова чемпионаты қатты күшейіп келеді. «Шерифке» чемпион бола салу оңай емес. «Зимбру», «Милсами» және «Петрокуб» сияқты командалар күшейіп, жақсы инвестиция салуда. Әрине, «Астана» немесе «Қайрат» Молдовада ойнаса, чемпиондық атақ үшін еш қиындықсыз күресе алар еді. Сол сияқты «Шериф» те Қазақстан біріншілігінде чемпион атана алады – олардың жақсы ойыншылары бар, қаржылық ресурстары мықты және шетелден сапалы легионерлерді шақыра алады», - деді Н'Диае.

2021 жылы «Лион» академиясының түлегі «Шерифтен» «Қайсарға» ауысып, қазақстандық клуб сапында 25 матч өткізді. Ол қазір Францияның бесінші дивизионында өнер көрсететін «Сент-Женевьевте» доп теуіп жүр.