Дмитрий Огай – «Астана» мен «Ақтөбенің» КЛ-дағы мүмкіндігі жайлы: екеуіне де оңай болмайды

Танымал қазақстандық бапкер әрі сарапшы Дмитрий Огай BorodAbata.kz сайтына берген сұхбатында «Астана» және «Ақтөбенің» қатысуымен өтетін Конференция лигасының екінші іріктеу кезеңіндегі қарымта матчтар туралы пікірімен бөлісті.

Огай бірінші матчта «Зимбрумен» тең түскен елордалық клубқа сенім артып отыр:

«Бірінші матчқа қарағанда, «Астана» қарсыласын жеңуі керек. Ойынның соңғы жағында елордалықтардың «Зимбрудан» бір бас жоғары екенін көрсетті. Дегенмен, бүгін қарсыластың өз алаңында ойнайтынын айта кету керек, сондықтан азды-көпті қиындықтар туындауы мүмкін».

Өз алаңында чехиялық «Спарта» командасын 2:1 есебімен ұтқан «Ақтөбеге» келсек, сарапшы бұл матчқа былай баға берді:

«Алғашқы матчты ауа-райы мен алаң сапасына байланысты бағалау қиын болды. Бірақ кейбір эпизодтардан «Спартаның» өте ұйымшыл және көп қимылдайтын команда екені белгілі болды. «Ақтөбені» Прагада өте қиын матч күтіп тұр. Әрқашан келесі кезеңге өтетін мүмкіндік болғанымен – барлығы матч күні шешіледі», - деді Огай.

Қос команданың да қарымта ойыны 31 шілдеде өтеді. «Астана» Кишиневте «Зимбрумен», ал «Ақтөбе» Прагада «Спартамен» күш сынасады.