Садыбеков – КуПС-пен болған ойын жайлы: бізге ешкім сенбеді, бірақ келесі кезеңге өттік

Алматылық «Қайраттың» капитаны Әділет Садыбеков BorodAbata.kz сайтына берген сұхбатында Чемпиондар лигасының екінші іріктеу кезеңінің финляндиялық КуПС-пен болған қарымта матч (3:0) туралы пікір білдірді.

«Өте керемет эмоцияларды бастан өткердік. Осындай лық толы стадион бізді жақсы ойнауға итермелейді, әр жанкүйерге қолдау көрсеткені үшін рахмет. Ойын басталмас бұрын бізге ешкім сенбеді, бірақ біз тарих жасап, екінші раундтан да өттік. Енді үшінші турдағы матчқа дайындалуымыз керек. Сондай-ақ бізде «Ұлытауға» қарсы чемпионат ойыны бар – біз ҚПЛ мен еурокубок ойындарын бөлмей, бәріне бірдей қараймыз».

Садыбеков алаңға шықпас бұрын бапкерден қандай нұсқау алғанын да айтты:

«Жаттықтырушы маған орталықты ұстап, әрбір екінші допқа үлгеруім керектігін айтты. Негізгі міндет допты ұстап тұру және оны алға қарай жылжыту болды».

Чемпиондар лигасының келесі турында «Қайрат» «Слованмен» ойнайды. Алматылық команданың капитаны алдағы қарсыласына баға берді:

«Өткен жылы «Слован» Чемпиондар лигасының негізгі кезеңінде өнер көрсетті. Ең қиын әрі эмоционалды кездесу соларға қарсы болады. Мүмкіндіктер туралы ештеңе айта алмаймын – ойын алдында қос команданың мүмкіндігі 50/50 болады», – деді Садыбеков.

«Қайрат» Алматыда КуПС командасын Сәтпаев, Жоржиньо және Громыко соққан голдардың арқасында жеңді. Алматылықтар қос матчтың қорытындысы бойынша (3:2) жеңіске жетіп, кем дегенде Конференция лигасының топтық кезеңіне шығуға мүмкіндік алды. Чемпиондар лигасының үшінші раундында алматылықтар «Слован» (Словакия) командасымен күш сынасады.

Бұған дейін алматылық команданың португалиялық қорғаушысы Луиш Мата КуПС-пен болған ойынды қорытындылаған еді.