Луиш Мата – КуПС-пен болған камбэк жайлы: Финляндияда да, үйде де жақсы ойнадық

«Қайраттың» португалиялық қорғаушысы Луиш Мата BorodAbata.kz сайтына берген эксклюзивті сұхбатында Чемпиондар лигасының екінші іріктеу кезеңінде КуПС-пен болған жеңісті матч туралы айтты.

«Бұл ерекше ойын болды. Біз екі гол соғып, есепті теңестіру керек екенін білдік, сондықтан бірден алға шықтық. Барлығы біздің камбэк жасай алатынымызға сенді. Бізге келесі матчтарда да бүгінгідей қолдау қажет – тек солай ғана жеңісті жолды жалғастыра аламыз.

Финляндияда, әрине, оңай болған жоқ. КуПС жасанды алаңда ойнауға үйренген, оларға оңайырақ болды. Бірақ сонда да, менің ойымша, біз олардан күштірек едік. Олар алыстан соққы жасап, екі гол соқты, бізде де көп мүмкіндік болды. Міне, бүгін Алматыда біз матчты жақсы бастап, мықтырақ екенімізді көрсеттік. Келесі кезеңге шыққанымызға қуаныштымыз.

Біз үшін барлық жанкүйерлердің қолдауы маңызды, әсіресе фан-клубтың жігіттері. Олар бізге қуат береді, соның арқасында барымызды саламыз. Жанкүйерлерсіз ойнау қиын, бірақ мұндай атмосферада доп тебу ләззат сыйлайды. Біз чемпионатта да, Еуропада да келесі матчтарға дайынбыз», - деді Мата.

«Қайрат» Дастан Сәтпаев, Жоржиньо және Валерий Громыконың голдарының арқасында финляндиялық «КуПС» командасын 3:0 есебімен жеңді. Алматылықтар қос матчтың қорытындысы бойынша (3:2) жеңіске жетіп, кем дегенде Конференция лигасының топтық кезеңіне шығуға мүмкіндік алды. Чемпиондар лигасының үшінші раундында алматылықтар «Слован» (Словакия) – «Зринйски» (Босния) жұбының жеңімпазымен ойнайды.