Чехия құрамасының экс-ойыншысы: Қазақстан инфрақұрылымды дамытпаса, жетістікке жетпейді

Қарағандылық «Шахтер» клубының және Чехия құрамасының бұрынғы жартылай қорғаушысы Лукаш Дроппа BorodAbata.kz сайтына берген сұхбатында қазақстандық футболдың проблемалары және Қазақстан клубтарының еуропалық командалармен бәсекеге түсуі үшін қажетті негізгі аспектілер туралы пікірімен бөлісті.

«Соңғы рет Қазақстанда алты жыл бұрын болдым. Содан бері көп нәрсе өзгерген шығар, бірақ ол кезде көргенім, әрине, инфрақұрылымға қатысты мәселелер болды. Академиялар, жаттығу алаңдары, стадиондардағы төсеніш – мұның бәрі төмен деңгейде еді. «Шахтердың» негізгі стадионындағы алаңның сапасы жақсырақ болғанымен, жаттығуды 20 жыл ауыспаған төсеніште жасап жүрдік. Мұны тіпті көше футболы деп айтсақ та болады. Ондағы төсенішті синтетика деп айтуға ауыз бармайды. Балалар да сол жерде жаттығу жасап жүрді».

Дроппа «Қайрат» академиясын басқа қазақстандық клубтар үшін үлгі ретінде атап өтті:

«Алматыда «Қайраттың» керемет академиясы бар екенін білемін. Басқа клубтар олардан үлгі алуы керек – инфрақұрылымды қалай құру керек және жастармен қалай жұмыс істеу керектігін үйрену қажет. Өйткені Қазақстанда дарынды ойыншылар бар. Бірақ бұл жерде инфрақұрылым мен дайындық маңызды рөл атқарады. Сондай-ақ ойыншыларға өзін-өзі күту, ойынға және жаттығуларға қалай дайындалу керектігін үйрету керек. Бұрын олар мұны кәсіби түрде жасай алмайтын немесе оларға үйрететін ешкім болмады».

ҚПЛ-ның бұрынғы легионерінің айтуынша, қазір футболда бәсекелестік күшейіп келеді және Қазақстан бұған дайын болуы керек:

«Әрбір жаңа буынның алдыңғысынан мықты болуы маңызды. Өйткені басқа елдер бір орында тұрған жоқ. Мен жақында Румынияда болдым – олар стадиондар, академиялар салып жатыр. Сондай-ақ Чехия мен Венгрияда да өзгерістер бар. Егер Қазақстан Еуропада жетістікке жетуді қаласа, инфрақұрылымға инвестиция салып, жағдай жасауы керек. Олай істемесе, жеңіске жету қиын болады. Қазір қаржылық жағдайдың қалай екенін білмеймін, бірақ бұрын көптеген клубтарда қиындықтар болды – бұл халықаралық аренада ілгерілеуге кедергі келтіретін басты себептердің бірі», – деді Дроппа.

Лукаш Дроппа қарағандылық клубта 2018 жылдан 2019 жылға дейін ойнаған.