Властимил Петржела: Чехияда «Спартаны» қатты ұрысып жатыр

Атақты чехиялық маман Властимил Петржела «Спартаның» (1:2) жеңілісіне қатысты пікір білдірді. Кеше «Ақтөбе» Праганың командасын ұтып, биылғы еурокубок маусымындағы алғашқы жеңісіне қол жеткізді.

«Мен матчты көрген жоқпын, бірақ «Спартаның» Қазақстанда жеңілгені ұят болды. Бұдан артық айтатын ештеңем жоқ. Соңғы минуттардағы пенальти? Чехияның өзінде ол эпизодта ешқандай фол болмағанын айтып жатыр. Нәтижеге бәрі таң қалып, «Спартаға» ұрысып жатыр. Қатты ұят болды.

Менің ойымша, қарымта матчта «Спарта» жеңіске жетеді. Ойын Прагада өтетіндіктен, онда сіз әрқашан жақсырақ ойнайсыз. Мұндағы алаңның сапасы жақсырақ, сондықтан қорқатын ештеңе жоқ», - деді Петржела BorodAbata.kz сайтына берген сұхбатында.

Кешегі матчтың алдында «Зениттің» бұрынғы бапкері Чехияда «Ақтөбені» құрметтемейтінін айтқан болатын. Сондай-ақ «Спартаның» қазақстандық команданы сырт алаңда жеңетінін сенімді түрде болжаған еді.