Чехия құрамасының экс-ойыншысы – «Спартамен» болатын матч жайлы: Ақтөбеде кішігірім тозақ болады

Қарағандылық «Шахтер» клубының және Чехия құрамасының бұрынғы жартылай қорғаушысы Лукаш Дроппа BorodAbata.kz сайтына берген сұхбатында «Ақтөбе» мен «Спарта Прага» арасындағы ойын туралы пікірімен бөлісті.

«Болжам қарапайым: «Спарта» – фаворит. Олардың мықты ойыншылары бар, еурододалардағы тәжірибесі әлдеқайда көп. Өткен маусымда олар Чемпиондар лигасында өнер көрсетті. «Спартамен» жетістікке жеткен бас бапкер клубқа қайта оралды. Менің ойымша, олар қайтадан мықты болады. Өткен маусымның соңында олар сәл баяулап қалды, бірақ қазір бәрін нөлден бастап жатыр.

«Ақтөбе» үшін бұл өте қиын матч болмақ. Әрине, қос матчта бәрі болуы мүмкін – қызыл қағаздар, қателіктер, бірақ объективті түрде қарасақ, «Спарта» күштірек. «Ақтөбенің» мүмкіндігі бар, әсіресе өз алаңында, өйткені олардың тамаша стадионы және Қазақстандағы ең жақсы жанкүйерлері бар. «Спарта» үшін қиын болады. Менің болжамым – чехтар келесі кезеңге өтеді», – деді Дроппа.

Лукаш климаттық жағдайға да тоқталып өтті:

«Шамамен 27 градус және аздаған жаңбыр жауады деп күтілуде. Қазір Чехияда да ыстық – шамамен 30 градус. Сондықтан ауа-райы жағынан айтарлықтай айырмашылық болмайды. Шымкентте қиынырақ болар еді, бірақ Ақтөбеде ауа-райы қалыпты».

Дроппа жанкүйерлердің маңыздылығын да атап өтті:

«Мен олардың Ақтөбеде команданы қалай қолдайтынын білемін. Қарсылас үшін бұл «кішігірім тозақ» болайын деп тұр. Бірақ «Спарта» үлкен клуб, олар лық толы стадиондарда ойнауға үйреніп қалған. Бұл алаң иелері үшін плюс болуы мүмкін және Қазақстанда осындай жанкүйерлер бар екеніне қуаныштымын. Бұл шынымен де керемет. Бірінші матч «Спарта» үшін оңай болмайды. Тең ойын немесе минималды жеңіске жету олар үшін жақсы нәтиже болады. Ал Прагада алаң иелері барын салады. «Ақтөбе» «Легиямен» жақсы ойнады, оларды құрметтеймін. Бірақ «Спарта» Конференция лигасында емес, Чемпиондар лигасында ойнайтын команда.

«Ақтөбе» мен «Спарта» арасындағы алғашқы ойын 24 шілде күні Қобыланды батыр стадионында өтеді.