Молдова құрамасының экс-ойыншысы: еуропалық командаларға Қазақстанда ойнау қиын

Молдова құрамасының бұрынғы шабуылшысы және «Астана», «Тобыл», «Ертіс» клубтарының экс-ойыншысы Игорь Бугаев BorodAbata.kz сайтына берген сұхбатында «Астана» мен «Зимбру» арасындағы матч туралы пікірімен бөлісті.

«Бірінші матчта «Зимбру» да, «Астана» да ашық футбол ойнамайды деп ойлаймын. «Астана» фаворит екені анық, себебі барлық еуропалық командаларға Қазақстанға ұшып келу қиынға соғады. Астанада тұрақты құрам және бірнеше жылдан бері жұмыс істеп келе жатқан жаттықтырушы бар. «Зимбруда», керісінше, жаңа бапкер мен жаңа ойыншылар. Мұның жақсы не жаман екенін дөп басып айту қиын, себебі футболда не боларын білмейсің, бәрі команданың дайындығына байланысты, бірақ «Астана» еурокубоктардың тұрақты қатысушысы және оларда тәжірибе мол».

Бугаев бұған дейін де Молдова клубтары туралы болжамымен бөліскен еді.

«Мен «Ордабасыға» «Петрокубпен» болатын ойынның қиынға соғатынын айтқсн болатынмын, өйткені молдовалықтардың құрамы жақсы жасақталған және біраздан бері келе жатқан құрам. «Зимбрумен» де солай: олар мотивациямен, жақсы көңіл-күймен шығады. Қазір футбол ойнауды білмейтін командалар жоқтың-қасы. Бірінші матчта «Астананың» басымдығы болады, бірақ Кишиневта оңай болмайды».

Қос команда арасындағы алғашқы ойын 24 шілдеде Астанада, қарымта кездесу 31 шілдеде Кишиневте өтеді.