Огай – Эдмилсон жайлы: әлсіз көрінді, бірақ уақыт қажет

Қазақстандағы белгілі футбол маманы Дмитрий Огай BorodAbata.kz порталына берген сұхбатында Чемпиондар лигасының екінші іріктеу кезеңіндегі «Қайрат» пен Финляндияның «КуПС» клубы арасындағы алғашқы ойынға қатысты пікір білдірді.

– Ең әуелі түсінуіміз керек: бұл – Чемпиондар лигасы. Бұл кезеңде өз елінің чемпиондары бір-бірімен кездеседі. Шынымды айтсам, маған «КуПС» ұнады. Иә, қорғаныста қателіктер болды, бірақ жалпы ойын өрнегі жаман емес: допты жақсы ұстайды, шабуыл ұйымдастыра біледі, екі гол соқты. Екеуі де ұқсас: біреуі жақын бұрышқа, екіншісі алыс бұрышқа. Финдер жинақы әрі сенімді ойнады.

Сондай-ақ, Огай «Қайраттың» жаңа ойыншысы Эдмилсонның ойынына тоқталды:

– Шынымды айтсам, Эдмилсонды футболшы ретінде аса жақсы танымаймын. Командада жүргеніне де бір айдай ғана болған. Ал толық үйренісіп кету үшін уақыт қажет – ойын тактикасына да, қорғаныс пен шабуыл жүйесіне де бейімделуі керек. Бұл ойында аса көзге түсе алмады. Алдағы уақытта қалай ойнайтынын көре жатармыз, – деді Огай.

Сырт алаңда өткен алғашқы кездесуде «Қайрат» «КуПС» командасынан 0:2 есебімен жеңіліп қалды. Жауапты матч 29 шілде күні Алматыда өтеді.