«Жеңіс» клубының бұрынғы чехиялық легионері: қазақ футболы өз жолын табуы керек

2024 жылы елордалық «Жеңіс» сапында өнер көрсеткен чехиялық жартылай қорғаушы Лукаш Будинский BorodAbata.kz порталына берген сұхбатында қазақстандық клубтардың Еуропамен терезесі тең дәрежеде бәсекелесу жолдары туралы ойымен бөлісті.

– Барлығына ортақ, әмбебап бір шешім жоқ. Әр клубтың өз жолы бар: бірі жас футболшыларды баптап шығарады, енді бірі дайын ойыншыларды сатып алады. Мүмкін, инфрақұрылымды жақсарту керек шығар – табиғи төсеніші бар алаңдар көптеп салынсын. Не болмаса, қазақстандық футболшылардың көбі Еуропаға барып, тәжірибе жинақтасын, – деді Будинский.

Чехиялық легионер ойын ары қарай жалғады:

– Бұл оңай сұрақ емес. Мысалы, «Астана» еурокубокта бәсекеге түсе алады, себебі құрамында легионерлер көп. Бұл әдіс те нәтиже береді, алайда ол бәріне бірдей әсер ете бермейді, – деді Будинский.

Лукаш Будинский 2024 жылы «Жеңіс» сапында 16 ойынға қатысып, 2 гол соқты, 1 нәтижелі пас берген болатын.