«Покатилов кінәлі емес»: әйгілі эксперт «Сабахтың» ойыны туралы айтып, Анарбеков жайлы мәлімдеме жасады

Ресейлік комментатор Александр Шмурнов ASnews.kz сайтына берген сұхбатында әзербайжандық «Сабах» пен Қазақстан құрамасының қақпашысы Стас Покатиловтың Чемпиондар лигасындағы ойынына баға берді.

Әзербайжандықтардың мүмкіндігі

«Меніңше, төртінші себеттегі ең қиын жеребе «Сабахқа» түсті. Сондықтан бұған ең алдымен Чемпиондар лигасы деңгейінде бақ сынау мүмкіндігі ретінде қарау керек. Қонаққа келетін командаларды жанкүйерлерге көрсетіп, өзін мықтылармен салыстыру қажет.

Мұндай қарсыластарға қарсы жақсы нәтижеден үміттену – ақылға сыймайтын дүние, бұл басқалармен салыстырғанда аса мықты клуб ретінде көрінбейтін «Манчестер Юнайтедке» (0:4) қарсы ойында белгілі болды. Ұпай жинап, кейбір матчтарда тосынсый жасауға да болады, бірақ былтырғы «Қайрат» сияқты үміттенудің қажеті жоқ. Ол кезде қарсыластар оңайлау еді: «Брюгге», «Олимпиакос» және «Пафос» – өтуге болатын командалар болып көрінді. Дегенмен, алматылықтар кипрліктерге қарсы артық бір ойыншымен ойнап, небәрі бір ұпай (0:0) алды, бұл да үлкен сынақ шығар. Егер бұл «Қарабақ» болса, мен оларға көбірек мүмкіндік берер едім. Бірақ «Сабахтың» құрамы әлсіз ғана емес, оларда тәжірибе де жоқ», – деп атап өтті 59 жастағы сарапшы.

– Былтырғы Чемпиондар лигасының маусымынан кейін қазақстандық жанкүйерлер Темірлан Анарбековті Батыс болмаса да, Орталық немесе Шығыс Еуропадан көреміз деп үміттенген еді. Керемет жаңалық болмады. Бұл маусым Покатилов үшін өзін көрсету мүмкіндігі бола ма?

– Өзін көрсету мүмкіндігі болатын шығар, бірақ бұл аса қажет деп ойламаймын. Меніңше, қазақстандық футболшылар топ-команда деңгейіне өспесе, ҚПЛ-да ойнауы керек. Сіздер «Анарбеков орташа клубқа кетпегеніне көңіліміз түсті» дейсіздер. Ал мен мұндай клубқа барудың қажеті жоқ деп санаймын – Польша немесе Грекия чемпионатында ойнау арқылы айтарлықтай өсе алмайды.

Қақпашы үшін Қазақстан немесе Әзербайжан чемпионаты – қалыпты деңгей. Бұл – қажет сәттерде команданы құтқару қабілетіңді тексеретін нағыз жауынгерлік жарыс. Тек топ-деңгейге өту үшін ғана шекара асу керек. Кез келген спортшы ең жоғарғы жетістіктерге ұмтылуы тиіс.

Келесі трансфер алдында неге 100 рет ойлану керек?

– Мәселенің мәні – ақша табуда емес, мықтылардың мықтысы атануда. Барлығы бірдей Буффон немесе Месси бола алмайды, бірақ соған ұмтылу маңызды. Әрине, кейде аз-аздан, үздіксіз даму көмектеседі, бірақ мен қазақстандық және әзербайжандық лигаларды серб немесе мажар лигаларынан әлсіз деп санамаймын. Ол жаққа бару тиімсіз, ал кез келген маңызды жарыстағы командаға барудың жөні бөлек.

Сәтпаев «Бернлиде» ойнап жүр, жалпы Чемпионшип көрсеткіштер бойынша Еуропадағы алтыншы чемпионат. Ол Португалия, Нидерланд және Бельгия лигаларынан асып түседі. Бұл өте мықты көрсеткіш. Сондай-ақ, мысалы «Хоффенхаймға» ауысу да керемет нұсқа болар еді, бірақ егер Стасқа Мажарстанда «Сабахтан» үш есе көп табыс табу мүмкіндігі туса, кім бас тартар еді?

«Мен шетелдік клубпен келісімшарт жасастым» деген сияқты құр мақтану сөздерінің жұмыс істемейтініне сенімдімін. Мансабың түбегейлі өзгеретінін сезсең, сонда ғана трансфер жасауды ойластыру керек.

– Покатилов «Хапоэльмен» (жалпы есеп 6:4) және «Юнайтедпен» (0:4) болған матчтардағы ойыны үшін сынға ұшырады. Ал сіз оның соңғы ойындарын қалай бағалайсыз?

– Ол жаман ойнамады! Біз матчтан кейін («МЮ-ға» қарсы) сөйлескен кезде, Стастың нәтижеге қатты көңілі толмады, бірақ ол немесе басқа біреу сәтсіздікке ұшырады деген сезім жоқ. Бірінші таймдағы голдар ма? Кешіріңіз, ол жерде құтқару өте қиын еді. Қақпашыны кінәлау орынсыз.

«Хапоэльмен» болған ойында да көп жіберіп алды, бірақ мәселе Покатиловта емес. «Қайратта» да бір мәселе – қорғаныс. Былтыр біз Рафаэль Уразбахтинмен бірге отырып, қорғаныстағы ойынды ұйымдастыру туралы сөйлескенбіз. Тринкау, Аугусто, Мбаппе соққан доптардың барлығы – қарсыласты жабу керек болған 20 метрлік аймақтан соғылғанын түсіндік.

Қазақстандықтарға тағылған айып орынсыз ба?

– Қақпашыларға қандай кінә тағуға болады? Иә, кей жерде құтқара алмады – сол Темірлан «Олимпиакосқа» қарсы матчта жақын бұрыштан гол жіберіп алды (0:1). Алайда, маңызды мәселе қорғаныста жатыр. Сол мәселе «Юнайтедқа» қарсы өткен кездесуге де қатысты. Аймақтарды жабуға болатыны көрініп тұрды. Бірінші голды алайық: Доргу сол қапталдан жүгіріп өтті, пас асырды, сөйтіп Кунья есеп ашты.

Бұл қарымта шабуыл емес, «МЮ» үшін үйреншікті стиль болды. Егер байқасаңыз, олар дәл осындай голды «Эвертонға» да соқты: Бруну сол қапталдағы Шоуға пас береді, ойыншы жүгіріп өтіп, пас асырады және Шешко нүкте қойды (2:2). Мұндай комбинацияда команданы қақпашы емес, дұрыс қорғаныс құрылымы мен қарсыластың ойынын оқи білу қабілеті құтқару керек.

«Сабахтың» 33 жастағы қақпашысы Стас Покатилов Темірлан Анарбековпен бірге Ұлттар лигасының алдағы матчтарына қатысу үшін Қазақстан құрамасына шақырту алды. «Ақжайық» түлегі соңғы рет ұлттық құрама сапында 2025 жылдың жазында (Беларусь құрамасына қарсы 1:4) өнер көрсеткен болатын. Чемпиондар лигасының негізгі кезеңінде әзербайжандық клуб «Арсенал», «Барселона», «Боруссия» (Дортмунд), «Вильярреал» және «Наполи» сынды грандтарға қарсы ойнайды.

Александр Шмурнов – танымал сарапшы және «Матч ТВ» арнасының бұрынғы комментаторы. 2022 жылы ол Ресейдің Украинаға басқыншы соғысына қатысты пікір білдіріп, кейіннен шетел агенті (иноагент) деп танылды. Қазіргі уақытта Еуропада тұрады.

Әзербайжанда Стас Покатиловты сынға алғандарға жауап берілді