Покатилов Чемпиондар лигасында «Манчестер Юнайтедке» жеңілуі туралы пікір білдірді

Әзербайжандық «Сабах» капитаны және Қазақстан ұлттық құрамасының қақпашысы Стас Покатилов УЕФА Чемпиондар лигасы жалпы кезеңінің алғашқы матчында ағылшындық «Манчестер Юнайтедтен» сырт алаңда көрген жеңілісі (0:4) туралы пікір білдірді, деп хабарлайды ASnews.kz.

Қақпашы аты аңызға айналған «Олд Траффорд» таблосындағы қорытынды нәтиже турнир дебютанттарының ойын мазмұнын толық көрсетпейтінін мойындады.

«Алғашқы қадамымыз сәтсіздеу болды. Бірақ бәрібір есеп біздің ойынымызды толық көрсетпейді деп санаймын. Бұл барлығымыз үшін дебют болды, біз жаман көрінген жоқпыз, ал екінші таймның кейбір сәттерінде комбинациялар жасай алдық. Біздің «Олд Траффордта» ойнағанымызды және бұл Чемпиондар лигасындағы алғашқы ойынымыз екенін ескерсек – бұл жаман емес. Есеп көңіл түсіреді, бірақ ештеңе етпейді, мұндай жағдайлар болып тұрады. Әрине, мен Қазақстанның намысын қорғап жүргенімді мақтан тұтамын. Қазақстандықтар да мені мақтан тұтады деп үміттенемін».

Өткізіп алған доптарды сараптай келе, Покатилов ірі жеңілістің себебі қарсыластың керемет әрекеттері емес, команданың өз қателіктері болғанын атап өтті.

«Голдар – біздің жеке қателіктеріміздің салдары. Бірінші допты жоғалтқаннан кейін біз оны қайтара алмадық, дәл осы жеке қателіктердің кесірінен гол өткізіп алдық. «Манчестер» қандай да бір суперкомбинациялар жасады деп санамаймын. Бәлкім, олар бар күшін салып ойнамаған шығар, мен оны түсінемін, бірақ бәрібір өткізіп алған голдар дәл біздің жеке қателіктерімізден кейін болды».

Капитан сондай-ақ ұжым ішіндегі көңіл-күй туралы айтып, жанкүйерлерге еурокубоктың келесі турларында басқа деңгейдегі футбол көрсетуге уәде берді.

«Мен жігіттерге ойын алдында, алаңға шықпас бұрын қайрап, сөз айттым – бізде осындай дәстүр бар. Ойыннан кейін бәрі бәрін түсінеді, ешкімге ештеңе түсіндірудің қажеті жоқ. Келесі матчта біз бұдан да қайратты боламыз, формамызды жинаймыз. Меніңше, біздің әлеуетіміз және әлі де өсетін жеріміз бар екені бәріне көрініп тұр. Біз сабырлырақ әрі еркінірек ойнайтын боламыз. Қазақстанға қолдау көрсеткені үшін рақмет, біз бұдан да мықты болып ораламыз».

Еске сала кетейік, Чемпиондар лигасының жалпы кезеңінің бірінші тур матчы манкуниандықтардың 4:0 есебімен сенімді жеңісімен аяқталды. Стас Покатилов капитандық таңғышпен толық матчты өткізіп, бес сейв жасады және пастарының дәлдігі 74%-ды көрсетті. «Сабах» еурокубоктардағы келесі матчын 13 қазанда прагалық «Славияға» қарсы өткізеді.

«Сабах» капитаны Стас Покатилов «МЮ-ге» қарсы матч үшін алған бағасын білді