Йонсен – «Ордабасымен» болған матч жайлы: дене түршігетіндей керемет атмосфера болды

«Торпедо Кутаиси» шабуылшысы Бьорн Йонсен BorodAbata.kz сайтына берген сұхбатында Конференция лигасының бірінші іріктеу кезеңінде «Ордабасыға» қарсы өткен жауапты матч жайлы ойымен бөлісті.

– Бұл өте қиын матч болды. Иракли Бидзинашвилидің голынан кейін біз үлкен энергия алдық. Ол бұған дейін де Қазақстанда ойнаған екен, біз бұл туралы матч алдында сөйлестік. Ол ғажайып соққысымен гол соқты. Соның арқасында қарсыласқа алға шығу үшін екі гол соғу керек болды. Бұл сәт біз үшін өте маңызды болды.

Одан кейін, әрине, қызыл қағаз алдық және бір тайм бойы қорғануға мәжбүр болдық. «Ордабасы» өте жақсы ойнады, оларда мүмкіндік көп болды. Олар үш гол соғуы да мүмкін еді. Білмеймін. Бірақ сәттілік жетіспеді және нәтижесінде біз келесі кезеңге өттік.

Сіздер гол соққанда менің денем түршігіп кетті – бұл жанкүйерлерден келген керемет импульс болды. Дәл осындай сезімдер үшін біз футбол ойнаймыз. Мұнда ойнау өте қиын болды. Алаң үлкен, атмосфера ерекше.

Жанкүйерлеріңіз ойынның басынан-ақ сіздермен бірге болды – тіпті матчқа бір күн бұрын біздің қонақүйге фейерверкпен келді. Бұл көңіл-күй сыйлайды, бірақ мұндай жағдайда ойнау оңай емес. Мұны басқа еш жермен салыстыра алмаймын – әр елдің өз мәдениеті бар. Бұл жақтың мәдениеті – ерекше әрі әдемі. Жанкүйерлеріңізбен және еліңізбен мақтана аласыз. Рақмет. Бұл өте әсерлі болды», – деді Йонсен.

Шымкентте өткен жауапты матч 1:1 есебімен аяқталды. Екі матч қорытындысы бойынша «Торпедо» келесі кезеңге өтті – 5:4.