Андрей Мартин: жаңа шабуылшы күтудеміз, бірақ уақыт өте аз

«Ордабасының» бас бапкері Андрей Мартин «Торпедомен» болған қарымта матчтан кейін мүмкін трансферлерге қатысты пікір білдірді, деп хабарлайды BorodAbata.kz.

«Әзірге жаңа шабуылшы мына күні келеді деген болжам жоқ, жұмыс жүріп жатыр. Жаңа форвардты асыға күтудеміз, бірақ біз іздеген ойыншыны әкелу басшылықтың қолынан келе ме , дұрыс футболшы таба аламыз ба, білмеймін. Уақыт өте аз.

Бізге гол соға алатын шабуылшы керек. Бірақ ондай футболшы келгенімен, қандай жағдайда болады? Командаға бірден көмектесе ала ма? Көптеген чемпионаттар мамыр айында аяқталды, футболшылар бір жарым ай бойы ойын практикасынан тыс қалды. Егер жаңадан шабцылшы алып жатсақ, жағдайды жақсартуға тырысамыз», - деді Мартин.

Шымкентте өткен қарымта кездесу 1:1 есебімен аяқталып, екі матчтың (3:4) қосындысы бойынша «Ордабасы» еурокубоктен ұшып кетті. Енді команда ішкі біріншілікке ден қойып, шабуыл шебін күшейтуге тырысады.