Андрей Мартин – «Торпедомен» болған ойын жайлы: екінші қабатта ойнау – біздің тактика емес

«Ордабасы» командасының бас бапкері Андрей Мартин баспасөз мәслихатында «Торпедоға» қарсы өткен қарымта матчтың нәтижесіне қатысты пікір білдірді, деп хабарлайды BorodAbata.kz.

«Екінші қабатта ойнау – біздің тактика емес. Сіздерге солай көрінген болар. Бізде «Торпедодағыдай» ұзын бойлы форвард жоқ. Сондықтан ешқашан олай әрекет жасамаймыз.

Бірінші матчта қорғаушылардың артына пас асырып, гол соққан едік. Оларда Соломон Квирквелия деген ебедейсіз қорғаушы бар, біз мұны ескердік. Оған қарсы Наумец пен Имнадзені қолданғымыз келді.

Бірақ қарсылас өте терең қорғанды. Олардың қорғаныс шебінде төрт емес, алты футболшы ойнады. Яғни, қапталдағы қос қорғаушысы да артта ойнады. Біз әртүрлі позициялардан теуіп көрдік, қорғанысты бұзу үшін қолдан келгеннің бәрін жасадық», - деді Мартин.

Грузияда өткен бірінші кездесуде «Ордабасы» 3:4 есебімен жеңілген болатын. Шымкентте өткен қарымта матч 1:1 есебімен аяқталды. Осылайша, Андрей Мартиннің командасы еурокубоктағы жорығын алғашқы іріктеу кезеңінен аяқтады.