Ресейлік сарапшы «Қайратқа» ескерту жасады: «Андерлехт» әдемі гол соға алады

Ресейлік футбол сарапшысы, Okko Спорт спикері Артём Прожога ASnews.kz сайтына берген сұхбатында «Андерлехттің» Еуропа лигасының плей-офф кезеңінде «Қайратқа» қарсы ойынға қандай деңгейде келе жатқанын айтты.

Соңғы жеңіліс команданың шынайы деңгейін көрсетпей ме?

«Әзірге «Андерлехттен» қандай да бір мәселе көріп тұрған жоқпын. Олар маусымды жақсы бастап, қатарынан төрт ойында жеңіске жетті. Бұл серия чемпионатқа жаңадан қосылған команда – «Беверенге» қарсы матчта (0:1) үзілді. Дегенмен сол ойында қақпашы Йоханнес Шенк өте жақсы өнер көрсетті. Ол сегіз сейв жасады, оның бірқатары алыстан жасалған соққылардан кейін орын алды.

«Андерлехт» қарсыластың қорғанысын бұзып өте алмаған кезде алыстан көп соққы жасады. Ал жақын қашықтықтан мүлт кетіп жатты. Брюссельдік команда бұл матчта тең нәтижеге лайық болды.

«Андерлехттің» шабуыл шебінде мықты футболшылар бар. Олар әдемі гол соға алады. Михайло Цветкович болмаса, Даниил Сикан бар. Ол болмаса, Тристан Дегреф немесе Адриано Бертаччини бар», – деді сарапшы.

Жас таланттарды да естен шығаруға болмайды

«Сонымен қатар командаға Лукаш Амброс пен Оливер Антман қосылды. Сондықтан құрамның мүмкіндігі мен тактикалық нұсқалары жеткілікті.

Ал команданың басты күші туралы айтсақ, жауап біреу – жастар. Өздеріңіз білетіндей, «Андерлехт» талантты футболшыларды тәрбиелеуімен танымал. Қазір соның нақты мысалдары пайда болды.

Солардың негізгісі – 17 жастағы вингер Джошуа Нга Кана. Ол негізгі құрамға еніп, тек шаш үлгісімен ғана емес, ойынымен де бәрінің назарын өзіне аудартып жүр. Болашағы өте зор футболшы», – деді ресейлік сарапшы.

«Қайрат» пен «Андерлехт» арасындағы алғашқы кездесу 20 тамызда Алматыдағы Орталық стадионда, қарымта матч бір аптадан кейін Брюссельдегі «Констант Ванден Сток» стадионында өтеді.

Бельгия чемпионатының екі турынан кейін «Андерлехт» турнир кестесінде 8-орында тұр. Витор Бруну жаттықтыратын команда құрамының жалпы құны 83,4 млн еуро деп бағалануда. Бұл «Қайраттан» (9,2 млн еуро) шамамен 9 есе қымбат.