«Партизанның» бас бапкері: «Тобылдың» осал тұстарын білеміз, соған байланысты қысым жасаймыз

«Партизан» клубының бас бапкері Саша Илич ASnews.kz сайтына берген сұхбатында Конференция лигасының үшінші іріктеу кезеңіндегі қарымта матч алдында «Тобылдың» осал тұстарын білетіндерін айтты.

Сербиялық команданың орташа жасы – 23 жас. Жүйкеге салмақ түспей ме?

«Командамыздың жас екені рас. Алайда өткен жылы да «Партизан» еурокубоктағы 5-6 матчта жеңіске жетті. Ертең «Тобыл» алғашқы минуттардан-ақ шабуылға шығатынын білеміз. Біз оған дайынбыз. Барлығы сәтті өтеді деп үміттенемін».

Белградтағы матчта «Партизан» қос қапталға басымдық беріп, тактика өз нәтижесін көрсетті. Бұл жолы не өзгереді?

«Әрине, біз әр матчты мұқият талдаймыз. Өзіміз жіберген қателіктер мен түзетуді қажет ететін тұстарды анықтаймыз. Сонымен қатар «Тобылдың» осал тұстарына қысым жасауға тырысамыз», – деді 48 жастағы маман.

Дастан Сәтпаевтың «Страсбурдағы» ықтимал бәсекелесі Милош Лукович туралы не айта аласыз? Ол қаншалықты мықты?

«Милошпен Сербияда жолымыз түйіспеді. Бірақ оның өте мықты, жас шабуылшы екенін білеміз. Оны жарқын болашақ күтіп тұр. Отандасымның мансабына сәттілік тілеймін».

Белградтағы матчта 3:0 есебімен ірі жеңіске жеткен «Партизан» Қостанайға фаворит ретінде келеді. Командалар арасындағы қарымта кездесу 13 тамызда өтеді.

«Челси» және Қазақстан құрамасының шабуылшысы Дастан Сатпаев жалға берілуі мүмкін. БАҚ мәліметінше, ол мансабын франциялық «Страсбурда» жалғастыруы мүмкін. Қазіргі таңда клуб құрамының жалпы құны 333,05 млн еуроға бағаланып отыр.