Болгарияда Түркістанға баға беріп, «Қайратқа» қарсы матч алдында жергілікті түйелерге «Левски» формасын кигізді

Болгарлық «Левски» алматылық «Қайратқа» қарсы Чемпиондар лигасының үшінші іріктеу кезеңіндегі қарымта ойын үшін Түркістанға келді. Меймандардың бұл сапары болгариялық БАҚ пен әлеуметтік желілерде қызу талқыланып жатыр, деп хабарлайды ASnews.kz.

София – Түркістан бағытындағы бес сағатқа жуық ұшудан кейін болгариялық делегация оңтүстіктің 40 градустық ыстығына тап болды. Дегенмен болгариялық медиакеңістікте үлкен ажиотаж тудырған сәт – «Левскидің» ресми әлеуметтік желілеріндегі жарияланым болды: клуб Түркістандағы туристік түйелерге команданың фирмалық көк жейделерін кигізіп, фотосуреттерін бөлісті.

«Сөзсіз, бұл суреттермен қала бұдан да әдемі көрінеді», – деп әзілдеп жазба қалдырды софиялық клубтың баспасөз қызметі.

«Левскидің» бас бапкері, испандық маман Хулио Веласкес Қазақстандағы ауа райы жағдайы алдағы ойында маңызды фактор болатынын мойындады.

«Мұндай жоғары температура мені алаңдатады, бірақ біз «Қайратпен» өтетін қарымта кездесудің кез келген сценарийіне дайынбыз. Алғашқы ойын артта қалды, біз оны ұмытып, тек нәтиже үшін ойнауымыз керек», – деді Веласкес.

Болгариялық команданың ойыншылары да алғашқы матчтағы басымдықты сақтап қалуға тырыспайтындарын және Түркістанда ауыр текетіреске дайындалып жатқандарын атап өтті.

Софияда өткен қос ұжым арасындағы алғашқы кездесу ойын соңында португалиялық Сержинью соққан жалғыз голдың арқасында «Левскидің» пайдасына 1:0 есебімен аяқталған болатын.

Чемпиондар лигасының іріктеуінің плей-офф кезеңіне шығу үшін өтетін қарымта бәсеке 11 тамыз күні «Түркістан Аренада» өтеді.

«Шегінерге жол жоқ»: «Қайраттың» бапкері Уразбахтин «Левскиге» қарсы ойынға дайындық жайлы айтты

«Левскидегі» қазақ Чемпиондар лигасындағы «Қайратқа» қарсы матчқа күтпеген болжам жасады