Жоржиньо: нәтижені алғашқы таймда-ақ жасап тастадық

«Олимпия» қақпасына гол соғып, нәтижелі пас берген «Қайрат» шабуылшысы Жоржиньо BorodAbata.kz сайтына берген сұқбатында матч туралы өз ойын айтты. 

«Ең алдымен, бәрін командалық рух шешіп кетті. Бірінші ойында аздап қобалжыдық, допты толық бақылауда ұстай алмадық, қарсыласта да жақсы мүмкіндіктер болды.

Бірақ бүгін бәрі басқаша болды: допқа жақсы иелік еттік, көп жүгірдік, жақсы прессинг жасадық және ұйымдасқан түрде қорғандық.

Ойын бастала салысымен тізгінді өз қолымызға алдық. Ерте соғылған гол бізге сенім берді. Нәтижені бірінші таймда-ақ жасап тастадық, ал екінші таймда сол нәтижені сақтап қалдық», – деді Жоржиньо.

«Қайрат» «Олимпияны» жалпы есепте 3:1 есебімен жеңіп, Чемпиондар лигасының екінші іріктеу кезеңіне жолдама алды.