15 күнде бес ойын: «Тобыл» бапкері «Партизанға» қарсы ойынға дайындық жайлы айтып берді

Қостанайлық «Тобылдың» бас бапкері Мирослав Ромащенко ASnews.kz басылымына берген сұхбатында ҚПЛ-дың 20-турындағы «Ордабасымен» өткен матчты (0:2) қорытындылап, сербиялық «Партизанға» қарсы Конференциялар лигасының ойыны алдындағы команданың күрделі логистикалық қиындықтары туралы айтып берді.

«Ордабасымен» өткен матч және Йонсенді бақылау

«Йонсеннің шабуылдың бүкіл шебінде белсенді қозғалатынын түсіндік. Дербес ешкімді опекалаған жоқпыз – оның аймағында Пап Алиюн Ндиайе жұмыс істеуге тура келді.

Біз әрқашан дұрыс прессинг жасай алмадық, өйткені мұндай элементтерді жаттығуларда пысықтау керек. Бізде бұған уақыт мүлдем болмады: «Паневежиске» қарсы 120 минут тым кеш аяқталды, келесі күні тек қалпымызға келіп үлгердік те, Шымкентке екі рейспен ұштық. Жаттығусыз команданы дайындау қиын, сондықтан көп нәрсені ойын барысында түзетуге тура келді. Ойыншыларға айтар өкпем жоқ. Матч соңында, тіпті азшылықта ойнасақ та, есепті теңестіруге мүмкіндігіміз болды, бірақ сирек мүмкіндікті пайдалана алмай, екінші голды өткізіп алдық».

«Партизанға» қарсы матч алдындағы логистикалық қиындықтар

Қостанайлықтардың бапкері команданың Сербияға екі бөлек топпен ұшуға мәжбүр екенін түсіндірді:

«Белградқа Астанадан екі бөлек топпен ұшатынымыз, әрине, дайындығымызға әсер етеді. Біз бәріміз бірге қалпымызға келіп, ұшаққа бірге отырып ұшқымыз келеді – біз бір командамыз ғой. Ұжымды бөліп-жару – бұл әрдайым жаман, бірақ жағдай осындай, біз ештеңе істей алмаймыз.

Ең бастысы – жігіттердің миында бұл қиын жағдай деген ой қалып қоймауы тиіс. Біз бір жұдырықтай жұмылып, белдесуге дайын болуымыз керек. Біз қазақстандық футболдың намысы үшін ойнаймыз, сондықтан мұндай нәрселерге алаңдауға болмайды», – деді Ромащенко.

Жагоровтың алаңнан қуылғаны: эмоция мен шаршау

«Мұнда бәрі айқын. Біздің ойыншы допқа бірінші болып жетіп, дұрыс шешім қабылдамады. Бұның бәрі шаршаудан және толық қалпына келмеуден – ойын жағдайын дұрыс бағалай алмады. Ал доптан айырылғаннан кейін эмоцияға бой алдырды. Түсінікті, шаршаған, ешкімнің жеңілгісі келмейді, сондықтан бұл эпизодта Жагоровта эмоция басым болды. Бұл алаңда болмауы тиіс сәт еді, бірақ эмоция жеңіп кетті», – деді бапкер.

«Ордабасыдан» ұтылғаннан кейін (0:2) «Тобыл» 22 ұпаймен Қазақстан премьер-лигасының турнирлік кестесінде 10-шы орында келеді.

Конференция лигасының үшінші іріктеу кезеңіндегі «Партизанға» қарсы алғашқы ойынды қостанайлықтар 6 тамызда Белградта өткізеді.

«Тобылдың» марокколық легионері – «Ордабасыдан» жеңілгені туралы: жекелеген сәттер шешіп кетті