«Жеңіс» сапындағы словениялық легионер: «Қайрат» Люблянада өзіне қажет нәтижеге қол жеткізді

Елордалық «Жеңіс» клубының қорғаушысы Матия Ром BorodAbata.kz сайтына берген сұхбатында Чемпиондар лигасының алғашқы іріктеу кезеңіндегі «Қайрат» пен «Олимпия» арасындағы ойыннан алған әсерімен бөлісіп, Алматыдағы жауапты матчқа болжам жасады.

«Иә, бірінші ойынды тамашаладым. Менің ойымша, «Қайрат» Люблянада өзіне қажет нәтижеге қол жеткізді – бұл өз алаңындағы жауапты матч алдында жақсы көрсеткіш.

Алматыда «Олимпия» алғашқы ойындағыдай допқа көп иелік етеді деп күтпеймін. «Қайрат» өз алаңында мықты ойнайды деген ойдамын. Бірінші матч 1:1 есебімен аяқталғанын ескерсек, келесі кезеңге өту мүмкіндігі «Қайратта» көбірек», – деді Ром.

Люблянада өткен алғашқы матч 1:1 есебімен аяқталды. 59-минутта Дастан Сәтпаев «Қайратты» алға шығарғанымен, жеті минут өткен соң Диогу Пинту есепті теңестірді.

«Қайрат» пен «Олимпия» арасындағы жауапты кездесу 15 шілде күні Алматыда өтеді.