ҚПЛ-дың кипрлік экс-легионері – «Қайраттың» ЧЛ-дағы матчы туралы: «Омонияда» басымдық бар

«Жеңістің» кипрлік экс-қорғаушысы Константинос Венизелу ASnews.kz сайтына берген сұхбатында Чемпиондар лигасының екінші іріктеу кезеңіндегі никосиялық «Омония» мен алматылық «Қайраттың» текетіресінен не күтетінін бөлісті.

«Омонияның» үстемдігі туралы

«Омония» өткен маусымда анық ең үздік команда болды: оларда ең сапалы құрам және жалпы алғанда ең мықты өтінім болды. Оларда бәсекелестік дерлік болған жоқ – олар чемпионатты Ларнаканың АЕК клубынан 19 ұпайлық үлкен басымдықпен жеңіп алды.

Олардың басты күші шабуылдың тиімділігінде еді: «Омония» маусымды соққан 88 гол сияқты таңғажайып көрсеткішпен аяқтады. Бұл статистика олардың шабуыл шебінің шеберлігін ғана емес, сонымен бірге бүкіл маусым бойы көрсеткен үстемдігін де айқындайды».

«Қайраттың» мүмкіндіктері

«Омония» мен «Қайрат» арасындағы матчтарға келер болсақ, мен жоғары сапаға, қарқындылыққа және жарқын сәттерге толы өте бәсекелі екі кездесу күтемін. Екі клубтың да өзіндік футболдық қағидалары мен тактикалық тәсілдері бар, бұл дәл осы текетіресті тартысты етеді.

«Қайрат» өткен маусымда Чемпиондар лигасында өнер көрсетіп, бағалы тәжірибе жинақтады, бұл фактор олар үшін маңызды артықшылыққа айналуы мүмкін. Әрине, Сәтпаевтың жоқтығы – алматылықтар үшін ауыр соққы, бірақ «Омонияның» да өткен маусымда 38 матчта 27 гол соққан басты форварды Райан Ммаэдан айырылғанын ұмытпаған жөн.

Жалпы терезесі тең күрес күтемін, бірақ «Омонияда» сәл басымдық бар және тап осы клуб фаворит болып табылады деп есептеймін», – деді қорғаушы.

Чемпиондар лигасы іріктеуінің екінші раундындағы алғашқы кездесу 22 шілдеде Никосияда (Кипр) өтеді. Қарымта ойын 29 шілдеде Алматыда өтеді.

24 жастағы Константинос Венизелу 2025 жылғы маусымда жалға алу құқығымен елордалық «Жеңіс» сапында өнер көрсетіп, клуб атынан 13 матч өткізді.

Бұған дейін кипрлік «Арис» пен «Қайраттың» бұрынғы бапкері Алексей Шпилевский өзінің ойымен бөліскен еді.