«Динамо Ситидің» бапкері – «Астанамен» болатын қарымта матч туралы: Қазақстанға қайта оралғаныма қуаныштымын

Албаниялық «Динамо Сити» клубының бас бапкері Илир Дая Конференция лигасының іріктеу кезеңінде «Астанамен» болатын қарымта матч алдында өз ойымен бөлісті, деп хабарлайды ASnews.kz.

«Ертең бізді алғашқы ойынға ұқсас өте тартысты кездесу күтіп тұр. «Астана» сырт алаңда жеңіске жетіп, аз да болса басымдыққа ие болды. Дегенмен кейде мұндай жағдайдың да пайдасы бар. Алдыңда қандай міндет тұрғанын анық түсінесің және соған жету үшін бар күшіңді саласың.

Мен Қазақстанға да, «Астана» клубына да үлкен құрметпен қараймын. Бұған дейін «Балкани» клубын жаттықтырған кезде Қазақстанға келгенмін. Қарсылас команданың бас бапкері өзгермепті, сондықтан алдағы матч өте қызықты өтеді деп ойлаймын», – деді Дая.

Тиранада өткен алғашқы кездесуде «Астана» 1:0 есебімен жеңіске жеткен болатын. Қарымта матч 16 шілде күні Астанада өтеді.