«Паневежистің» экс-ойыншысы «Тобылға» қарсы матч туралы: қостанайлықтар – фаворит

Литвалық «Паневежистің» бұрынғы жартылай қорғаушысы Йован Чадженович ASnews.kz тілшісіне берген сұхбатында команданың Конференция лигасындағы қостанайлық «Тобылға» қарсы алдағы ойынына баға берді.

«Мен «Паневежисте» ойнаған кезде біз Литва чемпионы атандық. Алайда қазір команданың жағдайы басқаша, олар бұрынғыдай жақсы ойнап жүрген жоқ, жарыс кестесінде соңғының алдында тұр. «Тобыл» да биылғы маусымда үздіктер қатарында емес. Дегенмен, команданың қазіргі қиындықтарына қарамастан, фаворит – «Тобыл». Өте қызықты ойын болады», – деді Чадженович.

Еске сала кетейік, «Тобыл» Конференция лигасының екінші іріктеу кезеңі аясында «Паневежиске» қарсы ойнайды. Алғашқы матч 23 шілдеде Литвада, ал қарымта кездесу бір аптадан кейін Қостанайда өтеді.

31 жастағы жартылай қорғаушы «Паневежис» сапында 2,5 маусым өткізіп, ел чемпионаты мен Суперкубогын жеңіп алған. Черногориялық футболшы литвалық клуб сапында барлығы 93 матч өткізіп, бес гол соққан және екі нәтижелі пас берген.

Қазіргі таңда ойыншы черногориялық «Сутьеска» сапында өнер көрсетеді. Бұл команда алматылық «Қайратқа» қарсы Чемпиондар лигасының іріктеу кезеңіндегі қарымта матчын өткізеді. Алматыдағы алғашқы кездесу Қазақстанның қазіргі чемпиондарының 2:1 есебімен жеңісімен аяқталған болатын. «Қайрат» капитаны Чемпиондар лигасының матчына қатыспауы мүмкін.

Айта кетейік, Чадженович бұған дейін Қазақстанда «Тараз» және «Қайсар» клубтарының намысын қорғаған.

«Сутьеска» жартылай қорғаушысы – «Қайраттан» жеңілгені туралы: жауапты матчта мүмкіндік бар