«Динамо Сити» – фаворит»: «Астананың» экс-шабуылшысы – КЛ-дағы жеребе туралы

Албания құрамасының және «Астананың» бұрынғы шабуылшысы Аздрен Лулаку ASnews.kz сайтына берген сұхбатында елордалық клубтың Конференция лигасының бірінші іріктеу кезеңінде албаниялық «Динамо Ситиге» қарсы өтетін кездесуінен не күтетінін айтты.

Жұптың фавориті туралы

«Меніңше, қазір «Астана» үшін ең бастысы – Албаниядағы матчта жеңілмеу. Ал өз алаңында, өз жанкүйерлерінің алдында жеңісті жұлып алу керек, өйткені «Астана» өз үйінде әрқашан өте жақсы ойнайды. Бізді екі мықты команданың тартысты ойыны күтіп тұр.

Әрине, мен бұл клубта өнер көрсеткен уақытта «Астана» еурокубоктарда алапат күш еді. Бірақ қазір де, барлық қиындықтарға қарамастан, команданың жақсы нәтижелерге қол жеткізуге әлеуеті мен сапасы жетеді. Мүмкін, бүгінгі таңда «Динамо Сити» фаворит сияқты көрінетін шығар, дегенмен «Астана» өз алаңында мықты ойнайды».

«Динамо» тарапынан болатын басты қауіп

«Тираналық клубтың шабуыл шебі өте қауіпті. Қарсыластың шабуылшылары үлкен мәселе тудыруы мүмкін. Осы себепті «Астананың» қорғаушылары өте сақ қимылдап, матчтың барлық 90 минутында барынша концентрацияларын жоғалтпауы керек».

Ойынға болжам

«Иә, өз алаңыңда ойнау факторының маңызы зор. Өз үйінде «Астана» әрқашан жақсы өнер көрсетеді, оның үстіне адал жанкүйерлер команданы алға қарай демеп отырады.

Болжамға келетін болсақ, менің ойымша, Албанияда командалар 1:1 есебімен тең ойнайды. Қазақстандағы қарымта матчта да тең есеп тіркеледі деп ойлаймын, сондықтан ойын пенальти сериясына дойын баруы әбден мүмкін. Қос командаға да сәттілік тілеймін», – деді Лулаку.

Елордалық «Астана» УЕФА Конференция лигасының екінші іріктеу кезеңіне шығу үшін албаниялық «Динамо Ситимен» күш сынасады. Алғашқы кездесу 2026 жылдың 9 шілдесінде Тиранада, қарымта матч 16 шілдеде Қазақстанда өтеді.

Аздрен Лулаку қазақстандық жанкүйерлерге 2017 жылғы маусымдағы ойындары арқылы жақсы таныс. Сол жылдың бірінші жартысында албаниялық форвард «Астана» клубының намысын қорғап, барлық турнирлерде 19 матч өткізді (бір гол, екі ассист) және Қазақстан чемпионы атанды. Маусымның екінші бөлігін Лулаку қостанайлық «Тобылда» жалдау шарты бойынша өткізіп, ол жақта 13 матчқа қатысып, бір нәтижелі пас берді.