ҚПЛ-да ойнаған футболшы Қазақстан мен Грузия чемпионаттарын салыстырды

«Ертістің» бұрынғы ойыншысы Леван Куталия BorodAbata.kz сайтына берген сұхбатында Конференция лигасының алғашқы іріктеу кезеңіндегі «Торпедо Кутаиси» мен «Ордабасы» арасындағы матч алдында Грузия мен Қазақстан чемпионаттарын салыстырды.

«Қазақстан чемпионаты Грузиядан біршама күшті және мұның көптеген себептері бар. Бірақ бізде еуропалық клубтарды қызықтыратын көптеген сапалы футболшылар бар. Жас және дарынды ойыншылар үшін бұл жақсы чемпионат, өйткені осы жерден мықтырақ лигаларға кетуге болады. Қазақстандық клубтарға келетін болсақ, олардың бюджеті әлдеқайда көбірек. Бұл оларға сапалы легионерлерді шақыруға мүмкіндік береді. Менің ойымша, ҚПЛ-дың Грузия чемпионатынан басты артықшылығы осыда», - деді Куталия.

Командалар арасындағы алғашқы ойын 10 шілде күні Кутаисиде, қарымта ойын 17 шілдеде Шымкентте өтеді. 

Грузин шабуылшысы Леван Куталия 2020 жылдың қаңтарында «Ертістің» ойыншысы атанғанымен, клубтың жабылуына байланысты көп ұзамай Қазақстаннан кетіп қалды.