BBC тілшісі – «Арсенал»–«Қайрат» ойыны жайлы: «канонирлер» жеңуі тиіс

BBC Sport порталының тілшісі Джордж Аддо ASnews.kz сайтына берген сұхбатында Чемпиондар лигасының жалпы кезеңіндегі «Арсенал» мен «Қайрат» арасындағы соңғы матч жайлы пікірімен бөлісті.

«Бұл өте қызықты ойын болмақ, дегенмен командалардың турнирдегі мәселесі шешіліп қойған: «Арсенал» келесі кезеңге жолдама алып қойды, ал «Қайрат» үшін бұл – дебюттік маусымдағы соңғы матч. Осы маусымдағы Чемпиондар лигасында «Арсенал» барлық ойында жеңіске жетті. Тіпті «Интерге» қарсы кездесуде де қорғаныста өте сауатты ойнап, үш ұпайды қоржынына салды.

Қағаз жүзінде «Арсенал» жеңіске жетуі тиіс сияқты. Жалғыз мәселе – олардың Премьер-лигадағы қазіргі формасы: екі рет тең ойнап, өз алаңында «Манчестер Юнайтедтен» жеңілді. Әрине, командаға жеңісті жолға қайта оралу қажет. Бұл алаң иелері үшін қиындық тудыруы мүмкін, алайда «Қайрат» мұны тиімді пайдалана ала ма? Міне мәселе қайда жатыр», – деді Аддо.

BBC журналисі ағылшын клубының деңгейі матчқа әсер ететінін атап өтті, сонымен қатар қазақстандық команданың жүріп өткен жолына жоғары баға берді.

«Арсеналдың» деңгейі тым жоғары. Дегенмен «Қайрат» өзін көрсетуге тамаша мүмкіндік алып, Чемпиондар лигасында баға жетпес тәжірибе жинады. Келесі жолы турнирге қайта жолдама алса, әлдеқайда күшейіп оралады деп үміттенемін», – деп түйіндеді тілші.

«Арсенал» мен «Қайрат» арасындағы Чемпиондар лигасының соңғы тур ойыны Лондонда, «Эмирейтс» стадионында өтеді. Кездесу қаңтардың 28-нен 29-на қараған түні Қазақстан уақытымен 01:00-де басталады.

Бұған дейін лондондық «Арсеналдың» бұрынғы жартылай қорғаушысы Александр Глеб алматылықтардың мүмкіндігін бағалаған болатын.