Бельгиядағы қазақстандық маман – «Брюгге» жанкүйерлері жайлы: Борат үшін тұтқындау қажет

Бельгиялық «Левен» клубының диджитал-менеджері Қасым Халиев ASnews.kz сайтына берген сұхбатында Астанада «Борат» фильмінің кейіпкері ретінде жүрген «Брюгге» жанкүйерлерінің ұсталуына қатысты пікір білдірді.

«Бельгияда бұл фильмді шынымен жақсы көреді. Мен жергілікті адамдарға Қазақстаннан келгенімді айтсам, олар бірден: «О, Борат!» деп айтады. Ал фильмнің шын мәнінде Румынияда түсірілгенін айтсаң, қатты таңғалады.

Бізде Average Rob деген блогер бар, оны осы елдегі ең танымал блогердің бірі деуге болады. Бір кездері ол ағасымен бірге Бораттың бейнесіне еніп, көпшілікке ұнайтын контент жасаған. Бірақ бұл жанкүйерлердің қамауға алынуы – дұрыс шешім.

Мен бельгиялықтардың иммигранттар мен туристерге: «Қонақ болып барған еліңді құрметтеуің керек» деп айтатынын жиі көремін. Алайда өздері сол қағиданы елемей жатады. Оларды тұтқындау әділ шешім болды», – деді Халиев.

«Қайрат» пен «Брюгге» арасындағы матчтан (1:4) кейін Астана қаласының әкімшілік құқық бұзушылықтар жөніндегі мамандандырылған ауданаралық сотының қаулысымен Бельгияның үш азаматы ұсталды. Олар мас күйінде «Астана Арена» стадионының трибуналарына арнайы шомылатын киіммен шыққан.

«Борат» – Саша Барон Коэн түсірген америкалық-израильдік псевдодеректі комедия. Фильмде ойдан шығарылған қазақстандық журналисттің бейнесі көрсетіледі. Бұл туынды Қазақстанды жағымсыз қырынан танытқаны үшін елде үлкен наразылық тудырған.

Қасым Халиев 2012 жылдан бері Еуропада тұрады. Алматы облысы Шелек ауылының тумасы Бельгия чемпионатындағы клубтың әлеуметтік желісіне жауап береді.

Бұған дейін бельгиялық сарапшы әрі журналист «Астана Аренадағы» оқиғаға қатысты пікір білдірген болатын.