«Қайрат» легионері – стадион жайлы: Алматыда ойнағанды құп көремін

«Қайраттың» португалиялық қорғаушысы Луиш Мата ASnews.kz сайтына берген сұхбатында «Брюггемен» (1:4) болған матч жайлы пікір білдірді.

«Бұл біз үшін өте ауыр ойын болды. Кездесуді жақсы бастадық, алғашқы 30 минутта жаман ойнаған жоқпыз. Алайда алғашқы голды өткізіп алғаннан кейін концентрацияны жоғалтып, артынша тағы бір гол жіберіп алдық.

Екінші таймда өз деңгейімізде ойнай алмадық. Бұл матчты өз деңгейінде қабылдап, одан тәжірибе алуымыз керек. Қателіктерді талдап, алға жылжу қажет», – деді Мата.

Сондай-ақ португалиялық футболшы ойынның Алматыда емес, Астанада өтуіне қатысты пікірін айтты.

«Сылтау іздегім келмейді және Алматыдағы «Орталық» стадионда ойнасақ, бәрі басқаша болар еді деп айтпаймын. Бірақ жеке пікірімді сұрасаңыз, мен өз үйімізде, жанкүйерлеріміздің қолдауымен, лық толы стадионда ойнағанды қалаймын. Іріктеу кезеңінде бірлік болса, бәрі мүмкін екенін дәлелдедік», – деді қорғаушы.

Жеңіліске қарамастан, Мата бар назарын жаңа маусымға аударатынын айтты:

«Алда ұзақ маусым күтіп тұр. Басты мақсат – қайтадан чемпион атану. Келесі Чемпиондар лигасының іріктеу кезеңіне толықтай дайын болуымыз керек», – деп түйіндеді ол.

Чемпиондар лигасының жетінші турында «Қайрат» Бельгияның «Брюгге» клубына 1:4 есебімен жол берді.

Алматылықтар еурокубок маусымындағы соңғы ойынын 28 қаңтар күні Лондонда «Арсеналға» қарсы өткізеді.