«Қайрат» футболшысы – «Астана Аренадағы» қолдау туралы: жанкүйерлер көп болса екен деймін

«Қайрат» клубының қорғаушысы Егор Сорокин «Брюггеден» 1:4 есебімен жеңілгеннен кейін ASnews.kz сайтына берген сұхбатында жанкүйерлердің қолдауы жайлы пікір білдірді.

«Жанкүйерлер сәл көбірек болса екен деймін. Бірақ бұл жағдайды өзгертпейді және ақталу да емес. Қазіргі жағдайымыз осындай», – деді Сорокин.

Сондай-ақ қорғаушы Дастан Сәтпаевтың жоқтығы алматылықтардың шабуылдағы мүмкіндіктеріне қатты әсер еткенін мойындады.

«Иә, Сатпаевтың болмауы команданың шабуылдағы ойынына ықпал етеді. Кей сәттерде ойнау қиынға соғады. Ол алаңда айырмашылық жасай алатын, командаға өте қажет футболшы, – деп түйіндеді қорғаушы.

Дастан Сатпаев жарақатына байланысты бүгінгі кездесуге қатысқан жоқ және бапкердің айтуынша, ол тек ақпан айында ғана қатарға қосылады.

Алматылықтар үшін еурокубок маусымы 28 қаңтарда «Арсеналға» қарсы өтетін сырт алаңдағы матчпен аяқталады.