«Брюгге» капитаны – қазақстандық футболшылар жайлы: еуропалық клубтарға кетуге шамасы жетеді

Бельгия құрамасының жартылай қорғаушысы әрі «Брюгге» клубының капитаны Ханс Ванакен ASnews.kz сайтына берген сұхбатында Чемпиондар лигасындағы «Қайратпен» болған матчты (4:1) қорытындылап, қазақстандық футболшылардың болашағы туралы пікірін айтты.

«Қазақстандық ойыншылардың еуропалық лигаларға қаншалықты тез бейімделіп, жол таба алатынын айту қиын. Мен оларға қарсы екі рет ойнадым. Сәтпаевтың «Челсиге» ауысқанын білемін. Ол өте жас футболшы.

Егер олар Еуропа клубтарына ауысса, барған командасы мен лигасына тезірек бейімделуі керек. Олар мықты чемпионаттарға жолдама алады деп үміттенемін. Мұнда белгілі бір сапа бар және мен олардың ірі клубтарға кететініне сенемін», – деді Ванакен.

Бұған дейін Бельгия құрамасы сапында «Астана Аренада» гол соққан (1:1) жартылай қорғаушы Қазақстан ұлттық құрамасы мен «Қайратты» салыстырды.

«Қазақстан құрамасы мен «Қайратты» салыстырсақ, ұлттық құрамада ойын сапасы сәл жоғары болды деп ойлаймын. Бұған қараша айындағы матчта Сәтпаевтың ойнағаны да әсер етті, ал бүгін ол алаңда болған жоқ.

Бүгін біз ойынды бақылауда ұстадық. Жеңіске жетуді қаладық, себебі келесі аптада соңғы матч бар, біз әлі де Чемпиондар лигасының келесі кезеңіне өту мүмкіндігін сақтап қалдық», – деп қосты ол.

Сөз соңында Ванакен «Арсеналға» қарсы ойын алдында алматылықтарға ақ тілегін білдірді:

«Арсенал» мен «Қайрат»? Лондондықтарға қарсы ойнау әрдайым қиын. Олар сол жаққа барып, ешқандай қорқынышсыз ойнауы керек. «Қайрат» бұл маусымды жақсы өткізді, – деді бельгиялық футболшы.

Чемпиондар лигасының жетінші турында «Брюгге» 4:1 есебімен жеңіске жетті. Ал еурокубок маусымындағы соңғы матчты «Қайрат» 28 қаңтарда Лондонның «Арсеналына» қарсы өткізеді.